عيله ملاك جورجى
--------------------
مسكت كوبايه الشاى ووقفت ابص من الشباك. وسرحت فى العمارات العاليه
اللى محاوطه عمارتنا فى بيت ابويا القديم من كل ناحيه .. وافتكرت المنطقه دى زمان كانت عامله ازاى .. ( صوت التليفزيون عالى اوى ) عن اذنكوا هوطى التليفزيون
(اتخضيت )
ايه ده ..! لسه اللى بيتقال فى البرنامج ده !! جريمه نجع حمادى !! احداث فرشوط !! اضطهاد المسيحين فى مصر .. اقباط المهجر يتدحلون .. اياد اجنبيه تقف وراء الحادث لزعزعه الامن فى مصر ( انا هغير موضوع المقاله
الله يلعن ابو السياسه دى اللى هتوقعنا فى بعض .. من امتى واحنا فيه ما بينا
الهبل ده ؟!! ده احنا طول عمرنا صحاب وزمايل وجيران واكتر من الاخوات .. وعلى فكره ده مش كلام انشا ولا شعارات انا ماليش فى جو النصب ده .. انا مثلا فتحت عنيا على الدنيا وانا متربى فى بيت المرحوم ملاك جورجى ومراته طنط لى لى
ربنا يديها الصحه ( انا واطى معاكى يا طنط ) الست دى مثال للأم المصريه
الاصيله القويه والحنونه فى نفس الوقت .. الناس دول كانوا من اقرب الاصدقاء لأبويا وامى .. اتولدت فى حجرهم وكبرت على ايديهم ..زيى زى ولادهم بالظبط .. كيندى وميرفت ومجدى .. دول فعلا اكثر من اخواتى وتقريبا بل بالتاكيد
انا عشت معاهم اكتر بكثييييييير ما عشت مع اخواتى الفعليين .. كيندى عنده حاجه واربعين سنه اتكتبت عليه الغربه يا عينى من سنه 1988 بعد وفاه ابوه عم ملاك
عشان الحياه كانت صعبه .. من الكويت للأمارات لحد ما استقر فى امريكا
واتجوز وخلف هناك بس دلوقتى لما بينزل مصر بقى بالنسبه لى عامل زى ابو العلا البشرى ( دور الممثل العظيم محمود مرسى فى المسلسل الشهير ) ما بيعجبوش
الحال المايل ومقضيها انتقادات وعايز يصلح الكون لحد النهارده , وبالرغم من انشغاله
فى حياته وفين فى امريكا تلاقيه دايما فاكر يوم عيد ميلاد ابويا وسنويته
ويتصل ويسأل .. طول عمرى بحس انه اخويا الكبير .. ميرفت بقى لما ابويا طلق امى
وروحت عيشت معاه شويه كان ابويا بيخليها تنزل معايا وتشتريلى يونيفورم المدرسه وتنقيلى لبس العيد كانت هى كمان بالنسبه لى اخت كبيره بالرغم من اى
الفارق بينا فى السن مش كبير ( اى خدمه ) .. نيجى بقى لمجدى ملاك
اخوهم الصغير ده مصيبه من مصايب الزمن بس مصيبه حلوه .. أقر وأعترف انه مش بس
اخويا او صاحبى لأ ده فعلا بحس اوقات كتير اوى انه ابويا .. اه والله
مع انه اكبر منى بحداشر سنه لكن مافى مصيبه عملتها فى حياتى الا واول واحد بكلمه
عشان ينقذنى هو مجدى ملاك .. حاسس انه سند ليه .. مجدى لو عمل كارت
المفروض يكتب فيه مجدى ملاك كل حاجه .. يعملك اى حاجه ويكلملك اى حد .. علاقاته
متشعبه بدايه من كبار الشخصيات والمحترمين واعتقد لحد المجرمين
كمان لو تحب !! لما ابويا مات ظروفى الماديه اتلخبطت بشكل واضح .. مجدى بقى
كان ياخدنى ويجيبلى لبس من عند واحد صاحبه كان فاتح محل هدوم .. شويه ع النوته .. شويه مجدى يحاسب .. عادى ما هو اخويا .. اول ما اجوع ابرشط على طنط لى لى
فى البيت وافتح التلاجه بنفسى واطلع واديها .. عادى ماهو بيتى .. وياسلام بقى ع الاكل
فى ليله العيد بتاعهم خمستاشر اوبن بوفيه فى بعض .. وانا فى سن المراهقه
كنت مطلع عين امى وسيبتلها البيت اروح فين ؟
طبعا روحت عيشت عندهم فتره طويله واول واحده قفشت معايا علبه سجاير
هى طنط لى لى وطبعا مرمطتنى ساعتها .. نسيت اقولكوا ان ابويا اتأثر اوى بوفاه
عم ملاك الله يرحمه اللى اتوفى قبل ابويا بسنه بالظبط
ويمكن ده كان من الاسباب اللى ادت لأكتئاب ابويا وعجلت بوفاته
وعلى فكره ابويا وهو فى الأنعاش طلب يقابل طنط لى لى وهى الوحيده دونا عن كل الناس اللى وصاها عليا تاخد بالها منى لو جراله حاجه عشان كده هى الوحيد ( وامى طبعا ) لو
قلعت اللى فى رجلها ولسعتنى بيه على قفايا هيبقى على قلبى زى العسل
بل هقول لها الله عليك يا ست .. مهما قعدت احكى عن ذكرياتى مع عيله ملاك جورجى
مش هيكفينى مجلدات .. دول اهلى وحبايبى واخواتى يبقى ايه الهبل اللى فى البرنامج ده .. بجد بجد احنا بقينا فى الزمن المتعاص ايه اللى وصلناله ده ؟!!
اضطهاد ايه وفتنه ايه ؟!!! ده احنا قريبين من بعض جدا وفوق ما اى حد يتصور .. بنحب بعض .. بنخاف على بعض .. فى الفرح بنشارك بعض .. بنستلف من بعض .. لدرجه انى سالف من كجدى ملاك خمس تلاف جنيه من شهرين ولسه مارجعتهملوش !! مجود
حبيبى اظن بعد المقاله الحلوه دى ممكن تصر عليا شويه كمان
الإثنين مارس 19, 2012 2:06 pm من طرف 
موضوع: تانى مقاله لأيمن بهجت قمر فى جرنال عين >> عيله ملاك جورجى 
