صاحب العمود .. ثالث مقال للمبدع ايمن بهجت قمر

ثالث مقاله لأيمن بهجت قمر
فى جرنال عين
------------
بعنوان : صاحب العمود
-----------------

قررت النهارده اغير شكل المقالة وهسميها
اسم جديد (( بصراحه )) (كل واحد حر فى العامود بتاعه ) بصراحه

شريط اليسا الجديد : وحش جدا .. احسنت يا وليد سعد يا نجم الألبوم
فيلم (( كلمنى شكرا )) : فيلم واقعى عظيم .. كامل ابو على مكسب للسينما المصريه
مسلسل شريف منير الجديد : يا شريف اختياراتك كلها ذكيه ان شاء الله نكسر الدنيا زى ما حصل فى : قلب ميت
مبروك حصول اغنيه ( 6 الصبح ) واغنيه ( الناس الرايقة ) واغنيه ( غريبه الناس ) على احسن تلت اغانى لسنه 2009
خايف عليك يا احمد يا حلمى
حسام حبيب تراجع شديد
عمرو دياب يا هضبه يا تاعبهم
استفتاء ال
mma award
للاغنيه استفتاء باطل

تعليقات القراء على المقالات السابقه :
اشرف سمير صدقى .. مغاغه : ايمن بهجت قمر عبقرى العصر
سحر بدران الضو .. اسكندريه : يا ايمن يا جامد
تامر عبد المحسن .. الزاويه الحمرا : اهلا بيك رائدا للعامود الساخر
وفيه اكتر من كده بكتير بس التواضع حلو !
طبعا انتو مستغربين جدا من اللى انا كاتبه فوق ده وفيكو بيقول هو اتجنن
ولا ناوى يكتب مقالات عشان يظبط نفسه ؟! هقول لكم بصراحه
انا قررت النهارده بما انى بقيت من اصحاب العواميد الصحفيه انى ابتدى
اصفى حساباتى مع كل الناس اللى مضايقانى وهلعبها مصالح شخصيه
وهبتدى ابتز اى حد احطه فى دماغى و (( ح ارهبه )) بمقالاتى عشان يقلق
منى واعدائى يقولوا الواد ده لبش ومحدش له دعوه بيه .. انا قررت انتقد كل الشرايط
اللى نزلت وبالذات الشرايط اللى انا مش نازللى فيها اغانى زى شريط اليسا
كده بالرغم من انه عاجبنى .. وطبعا هقطع فى الشعرا الزملاء وهمجد شويه فى كام اغنيه لكام ملحن من اللى فيه بينى وبينهم مصالح مشتركه هنجمهم جامد
وهقول طبعا ان اللحن هو اللى شايل الاغنيه .. اما بالنسبه للمطربين .. التقيل فيهم ومقدرش عليه ههريه القاب مره الهرم مره شلال الاحساس .. اما الخفيف منهم واللى بيخاف من النقد دول بقى هفترى عليهم وهمسكهم واحد واحد
وهيكونوا بومبونايتى واللى هيفتح فيهم مخه معايا وياخد منى ست سبع اغانى اوعده انى فى اول مقاله ليا هتحول تماما لواحد تانى وفجأه ومش هتكسف وهكون
على راس الدافعين عنه ومن المعجبين بيه وبأعماله وبذكائه الخارق .. اما بقى
المنتجين فدول حبايبى واعمامى على طول الخط ان كان فى السينما كامل ابو على
عشان منتج تقيل وطبعا فيه غيره كتير .. وفى الكاسيت طبعا اونكل محسن جابر وخالو جمال مروان وصديق عمرى نصر محروس دول اخواتى الكبار واللى مينفعش ادوس لهم على طرف وبالطبع وماينفعش انسى (( روتانا )) وطنى التانى ! مايمنعش
طبعا انى اغتت على احمد حلمى بكام بؤ رخم عشان ما اشتغلش معايا
بعد (( اسف على الازعاج )) .. واروح ضارب عمرو دياب لقبين حلوين كده عشان
قرب يدخل فى شريطه الجديد .. وطبعا انقد اى استفتاء انا ما كسبتش فيه
وابتدى اشكك فى مصداقيته .. وعايزكو تاخدوا بالكو من طريقتى فى خبر شريف منير واستعانتى بحرف النون فى كلمه نكسر الدنيا يا شريف على اعتبار انى
ضميت نفسى ضمن فريق العمل ونطيت على كلمات التتر قبل ما اى حد يكلمنى ! وبالتاكيد مش هنسى الاغانى اللى انا مألفها ومش هخجل من انى افبرك خبر وهمى بحصول اغانيا على لقب احسن تلات اغانى فى 2009 ! وطبعا يا ويله
اللى ما يردش عليا فى التليفون هنفخه .. وفى اخر المقاله لازم هنقل لكم التعليقات المضروبه للمعجبين على مقالاتى وقد ايه اثنوا على التجربه
وافضل وانا فخور اوى انفخ فى نفسى واكيد هستبعد كل اللى علقوا بالسلب وقالوا عليا فاشل ! تخيلوا يا جماعه ان ده بجد ! اه طبعا فيه صحفيين محترمين
واعلاميين كبار انما برضه فيه النوع ده ناس كتير .. وكتير جدا ماليين الصحف والمحطات الفضائيه .. ناس معندهمش ضمير بيكتبوا لمصالحهم ولحساباتهم
الشخصيه وبمنتهى البجاحه ؟! وساعات الناس دول بيوصلوا لأعلى المناصب ويبتدوا يزيدوا متعاص ورا متعاص ورا متعاص .. وهما دول يبقوا من غير ما ندرى
اللى بيثقفونا وبيوجهونا ويحرضونا ويحركونا .. واحنا وولادنا كمان .. المتعاصين
بيكبروا لما الجهل بيستفحل فى المجتمع .. حلوه بيستفحل دى !
ملحوظه : اى صحفى او اعلامى هيقرا الكلام ده وهيتضايق او هيشيل فى نفسيته
يبقى اهلا بيه واحد من ضمن المتعاصين اللى انا بقصدهم فى المقاله

سلام مؤقت